ØKOUKA 2019

ØKOUKA I HALLINGDAL

Økouka er ei landsdekkjande feiring av økologisk og biodynamisk mat og landbruk. Arrangementa denne veka formidlar råvarer, kunnskap og inspirasjon. Denne veka, som i Buskerud er frå 20. – 29. september, vil vise fram mangfaldet av landbruks- og matproduksjon i Noreg og knyte det til folks kvardag.

I Hallingdal er det fleire arrangement denne veka. Økosjokolade inviterer til sjokoladekurs på Tid Kafé og Landhandel på Ål, i Nerol Økologiske Andelshage i Hol blir det skuronn på gamlemåten, Snekkerhaugen gard i Gol byr på gardsbesøk med jord- og kompostkunnskap. Deretter blir det fermenteringskurs på Vika Velferdsenter i Hol og eplepressing på Ål Bygdamuseum.

Sjokoladekurs

Måndag kjem ein av Økosjokolade sine ambassadørar for å halde sjokoladekurs. Dei seier: «Me viser deg korleis du enkelt kan lage ei sunnare sukkerfri sjokolade heime på ditt eige kjøken. Me brukar kun reine økologiske ingrediensar, sunnare alternative søtningsmidlar og skånsam framstilt kakao som gjer at resultatet blir ei herleg næringsrik sjokolade proppfull av antioksidantar, vitamin og mineral. Alle deltakarane får vere med å lage sjokolade og alle får smake på dei ulike variantane.» Kurset er både for born og vaksne.

Skuronn

I Nerol Økologiske Andelshage blir det onsdag ei unik mogelegheit til å vere med å skjære korn med skyru og ein får prøve kunsten å binde kornband som blir sett på staur til turk. Det blir høve til å mala korn til mjøl med handkvern. Det blir servert potetgraut og te av urter frå hagen til ein fagprat om korn. Både born og vaksne er velkomen.

Jord og kompost

Snekkerhaugen gard, Buskerud Bonde- og Småbrukarlag og Økologisk Norge inviterer til ei ettermiddagsamling torsdag der jord- og kompost er tema. Kunnskapsnivået blir tilpassa dei som kjem, enten ein er nyrbyrjar eller meir erfaren. Ein matbete ventar dei som kjem.

Fermenteringskurs

Vil du lære å fermentere grønsaker? Ta med økologiske grønsker gjerne frå eigen hage og kom til Vika Velferdsenter fredag. Fermentering er ein gjæringsprosess og konserveringsmetode der ein spelar på lag med dei gode bakteriane.

Eplepressing

Sundag blir Økouka avslutta med eplepressing på Ål Bygdamuseum. Ta med eigne epler og press din eigen juice eller smak på vår. Det blir sal av varm eplekake, økologisk kaffi og nypressa eplejuice.

Hjarteleg velkomen til inspirerande, lærerike og trivelege dagar!

Birgitte Lindhjem Hallingdal Museum

For meir info og program sjå:  https://www.okouka.no/